Donald Trump tha të enjten se nëse ai fiton Shtëpinë e Bardhë, ai do të shkarkojë prokurorin special Jack Smith “brenda dy sekondave” nga marrja e detyrës.

“Është kaq e lehtë. Do ta pushoja brenda dy sekondave”, u përgjigj Trump, raporton AP, transmeton Gazeta 10.

Siç ka thënë Trump, ky do të jetë ndër vendimet e para si president i Shteteve të Bashkuara të Amerikës, derisa e ka cilësuar prokurorin special si person “të poshtër”.

“Ai do të jetë një nga veprimet e para që do të ndërmarr”, ka thënë tutje Trump.

Kujtojmë se Smith ka ngritur dy raste federale kundër Trump. Njëri, duke e akuzuar atë për mbajtjen e paligjshme të dokumenteve të klasifikuara në pronën e tij në Mar-a-Lago në Florida, tjetri, duke e akuzuar atë për përpjekjet e tij në përmbysjen e procesit zgjedhor të 2020-s.

Jack Smith ka mbajtur postin edhe të kryeprokurorit të Zyrës së Prokurorit të Specializuar (ZPS) në Hagë, ku po gjykohet ish-presidenti Hashim Thaçi, Kadri Veseli, Jakup Krasniqi dhe Rexhep Selimi.

Nëntorin e 2022-s, Smith u largua nga Haga, për t’u kthyer në Shtetet e Bashkuara me qëllim që ta hetojë Trumpin.

Ai është fokusuar në hetimin e dokumenteve të klasifikuara të gjetura në shtëpinë e Trumpit dhe për rolin e ish-presidentit në sulmin ndaj Capitolit. /Gazeta 10/